Основната форма на глаголските аломорфи во албанскиот јазик во рамките на морфонолошките промени

Апстракт

Во статијата се разгледува прашањето поврзано со утврдувањето на основната глаголска форма во аломорфите на еден ист глагол во албанскиот јазик. Постоење на неколку морфолошки  варијанти е резултат на  регуларна вокална или консонантска промена на коренската основа позната како редување на сaмогласките. Зачетокот на повеќето од овие промени датира уште од пред 16 век, а голем дел од нив се среќаваат во сите албански дијалекти. Со оглед на фактот што морфонолошките промени носат значенски разлики, за правилно толкување на тие промени во албанскиот јазик важно е да се одреди која од аломорфите ќе се смета за основна форма. Авторот ги разгледува различните ставови за ова прашање во албанската лингвистичка традиција застапувајќи се за становиштето дека за основна форма на глаголот при толкувањето на развојот на вокалната или консонантска промена треба да се смета основата на сегашното време на индикативот.