ТРЕТ ТРАНСНАЦИОНАЛЕН СОСТАНОК ВО РАМКИТЕ НА ESIPP-ПРОЕКТОТ

Апстракт

Во периодот од 15 до 16 јуни 2016 година во просториите на Филозофскиот факултет во Скопје се одржа Третиот транснационален состанок на организациите вклучени во ESIPP–проектот (Equity and Social Inclusion trough Positive Parenting), на кој домаќин беше организацијата Македонско научно здружение за аутизам, која е дел од проектот.
На 15 јуни присутните ги поздрави проф. д-р Лена Дамовска, заменик декан на Филозофскиот факултет и проф. д-р Владимир Трајковски. Потоа, претставниците од Универзитетот во Нортхемптон David Preece заедно со Paul Bramble, кој беше присутен преку Skype, зборуваа за активностите и состојбата со проектниот менаџмент, а David Preece зборуваше и за извештајот за проектот.
Д-р Јасмина Стошиќ од Едукациско-рехабилитацискиот факултет ги запозна присутните со состојбата на спроведената програма на обуките.
Родителите во Р. Хрватска и Р. Македонија покажуваат задоволство од учеството во обуките. Loizos Simeou од Европскиот универзитет од Кипар зборуваше за реализираните и идните активности поврзани со одржливоста на проектот.
Cristina Fernandez од Аутизам Европа н¢ запозна со планот за дисеминација и неговото тековно реализирање, состојбата и посетите на веб-страницата на проектот и социјалните мрежи.
Проф. д-р Владимир Трајковски од МНЗА ги запозна присутните со резултатите од анонимниот прашалник за квалитетот на реализацијата на вториот транснационален состанок кој се одржа во јануари во Кипар. За учеството на родителите и родителските групи зборуваше Julia Hardcastle од Autism Concern.
На 16 јуни, на состанокот се зборуваше за позитивните лични доживувања од соработката на организациите вклучени во проектот, за подоброто запознавање на културните карактеристики на различните држави, за ширењето на нови пријателства како и за подобрувањето на вештините за работа на проект. Потоа, беа прецизирани датумите за идните транснационални средби, а се зборуваше и за текот на подготовките за присуство на XI конгрес на Аутизам Европа под мотото Среќни, здрави, со поголема самодоверба, кој ќе се одржи во септември 2016 во Единбург. Учесниците во ESIPP-проектот ќе учествуваат со постер-презентација на тема Развој на едукацијата на родители за аутизмот во Југоисточна Европа.
Од страна на тимот одговорен за спроведување и евалуација на обуките за родителите на децата со аутизам, беа евалуирани претходните обуки во Р. Хрватска и Р. Македонија и беа презентирани идните теми за следните обуки од страна на Ron Fortuna и Angela Capper.
Покрај работните активности, гостите имаа можност да го посетат Археолошкиот музеј на Филозофскиот факултет и да го запознаат градот Скопје со сите негови убавини и знаменитости.
На 17 јуни 2016 година во ПОУ „Д-р Златан Сремац“ - Скопје, 17 родители на деца со аутизам од различни делови на Р. Македонија, имаа можност да учествуваат во две работилници: Прашања поврзани со проблемите во исхраната и спиењето кај децата со аутизам oдржани од страна на Ron Fortuna и Angela Capper од организацијата Target Autism и Пубертетот и адолесценцијата кај аутизмот одржана од страна на д-р David Preece од Универзитетот Нортхемптон. Исто така, родителите имаа можност да разговараат и со Julia Hardcastle од родителската организација Autism Concern од Нортхемптон.