ВТОР ФОРУМ НА СЕРВИСНИТЕ СЛУЖБИ

Апстракт

На 16 март 2007 година на Филозофскиот Факултет беше одржан вториот форум на сервисните служби во организација на Македонското научно здружение за аутизам и Европската асоцијација на обезбедувачи на услуги за лицата со пречки во развојот на кој беа поканети сите директори на установите за лица со пречки во развојот во Република Македонија и дел од невладиниот сектор. Главна цел на овој форум беше обединување на секторот кој се занимава со давање на услуги на лицата со пречки во развојот, споделување на информации и модели на добра практика, како и споделување на искуства од Европската унија. Форумот го отвори и со него раководеше претседателот на МНЗА доц. д-р Владимир Трајковски. Официјално добредојде на присутните им посакаа деканот на Филозофскиот факултет проф. д-р Трајан Гоцевски и господинот Luk Zelderloo-генерален секретар на EASPD.
Како предавачи учествуваа господинот Luk Zelderloo (EASPD), госпоѓа Diana Chiriacescu (Handicap International-South Eastern Europe), проф. д-р Љупчо Ајдински-почесен претседател на МНЗА, господин Владо Крстовски („Порака“) и госпоѓа Лидија Крстевска („Отворете ги прозорците“).