СТРУЧЕН СОБИР: ПРОГРАМИ ЗА ИНТЕРНАЦИОНАЛИЗАЦИЈА НА УНИВЕРЗИТЕТСКИТЕ СТУДИИ И НИВНИТЕ ПОЗИТИВНИ ЕФЕКТИ ВРЗ КВАЛИТЕТОТ НА ОБРАЗОВАНИЕТО

Апстракт

На 4 и 5 декември 2009 година на Филозофскиот факултет во Скопје во организација на Институтите за дефектологија, психологија и педагогија од една страна, како и Факултетот за психологија при Универзитетот „Sapienza“ во Рим од друга страна се одржа Стручен собир кој беше посветен на петгодишното искуство од студиските размени и мобилноста помеѓу овие два факултети и универзитети.
Како почесни гости на Собирот присуствуваа ректорот на универзитетот „Св. Кирил и Методиј“ проф. д-р Велимир Стојковски и деканот на Филозофски факултет проф. д-р Горан Ајдински, кој во 2003 година беше еден од иницијаторите за отпочнување на оваа соработка.
На Собирот имаше учесници, професори и студенти од Македонија, Италија и Србија. Првиот ден беше наменет за презентација на трудовите од професорите кои на било каков начин учествувале во процесот на интернационализација и мобилност на универзитетските студии во изминатиот период. Претставници од Филозофскиот факултет беа: доц. д-р Зоран Киткањ, доц. д-р Наташа Чичевска-Јованова, доц. д-р Даниела Димитрова Радојичиќ, проф. д-р Лена Дамовска, проф. д-р Михајло Поповски и проф. д-р Трајан Гоцевски. Вториот ден од Собирот беше наменет за презентации на студентите кои преку своите извештаи го истакнаа своето искуство од студиските престои во други земји, од одржаните предавања, работилници и истражувања во практиката. Во овој дел свои презентации имаа и претставниците од Р. Македонија, кои во периодот на своето студирање биле на студиска размена на Универзитетот „Sapienza“ во Рим. 
Стручниот собир беше едно резиме од досегашната успешна соработка помеѓу овие два универзитети. Фокусот беше ставен на позитивните ефекти на меѓународното образование кое се состои од размена на наставен кадар, студенти, материјали за образование и истражување. Прифаќањето на интернационализацијата станува глобален тренд кој е неопходен дел за збогатување на универзитетското образование од една страна и развојот на науката од друга страна.