ГРАНИЦАТА КАКО ПРЕДМЕТ НА ИСТРАЖУВАЊЕ

Апстракт

Истражувањето на границата како концепт и феномен во современиот контекст се развива преку мултидисциплинарен пристап кој ја надминува нејзината традиционална географска димензија, проширувајќи се во културната, социјалната и психолошката сфера. Овој труд се фокусира на анализата на граничната култура како резултат на сложени процеси на влијание, хибридизација и трансформација кои се случуваат во рамките на граничните заедници. Истражувањето го нагласува значењето на визуелната култура и уметноста како моќни медиуми преку кои границите се артикулираат, перципираат и оспоруваат – не само како линии на раздвојување, туку како динамични простори на културна продукција и мобилност на идентитетот. Трудот прави дистинкција меѓу визуелната уметност и визуелната култура, анализирајќи ги нивните различни пристапи кон глобалната комуникација, колективната имагинација и индивидуалната креативност. Истовремено, се истражува концептот на „невидливоста“ на граничното население и улогата на сликата како потенцијална алатка за влез во јавната сфера. Преку критичка рефлексија на општествата во транзиција, глобализациските текови и културните прилагодувања, оваа студија предлага интердисциплинарен модел за разбирање на граничните култури како простори на преговарање, отпор и адаптација. Притоа, границата се појавува не само како механизам на исклучување, туку и како место за нови форми на културно изразување и реимагинација (преосмислување) на идентитетот во ера на дигитална поврзаност и глобални идеолошки трансформации.